Azərbaycan ilə Slovakiya arasında siyasi münasibətlər qarşılıqlı hörmət, etimad və səmərəli əməkdaşlıq prinsipləri əsasında uğurla inkişaf edir. Prezident İlham Əliyevin Slovakiya Respublikasının Prezidenti Peter Pelleqrinin Azərbaycana rəsmi səfəri çərçivəsində Şuşada verdiyi bəyanatda vurğuladığı kimi, Slovakiya–Azərbaycan siyasi əlaqələri çox yüksək səviyyədədir və qarşılıqlı səfərlər bunu əyani şəkildə göstərir. Bu fikir iki ölkə arasında mövcud olan sıx siyasi dialoqun və əməkdaşlığın yüksək səviyyəsinin bariz ifadəsidir. Son illər Azərbaycan və Slovakiya arasında dövlət başçıları, hökumət üzvləri və parlament nümayəndə heyətlərinin qarşılıqlı səfərləri intensiv xarakter almışdır. Bu səfərlər ikitərəfli münasibətlərin inkişafına yeni təkan verir, müxtəlif sahələr üzrə əməkdaşlığın genişləndirilməsi üçün əlverişli zəmin yaradır. Yüksək səviyyəli təmaslar ölkələr arasında qarşılıqlı etimadı möhkəmləndirməklə yanaşı, strateji əhəmiyyət kəsb edən məsələlərin açıq və konstruktiv müzakirəsinə imkan verir. Azərbaycan və Slovakiya beynəlxalq təşkilatlar çərçivəsində də səmərəli əməkdaşlıq edirlər. Hər iki ölkə beynəlxalq hüququn norma və prinsiplərinə hörmət, dövlətlərin suverenliyi və ərazi bütövlüyünün qorunması kimi fundamental prinsipləri dəstəkləyir. Bu ortaq yanaşma siyasi münasibətlərin möhkəm təməl üzərində inkişaf etməsinə mühüm töhfə verir. Siyasi əlaqələrin yüksək səviyyəsi iqtisadi əməkdaşlığın genişlənməsi üçün də əlverişli şərait yaradır. Energetika, nəqliyyat, ticarət, investisiya, sənaye və digər sahələrdə həyata keçirilən birgə layihələr tərəflərin qarşılıqlı maraqlarını əks etdirir. Dövlət rəhbərlərinin görüşlərində bu istiqamətlər üzrə əməkdaşlığın daha da dərinləşdirilməsi xüsusi diqqət mərkəzində saxlanılır. Slovakiya Prezidenti Peter Pelleqrinin Qarabağa və Şuşaya səfəri də xüsusi əhəmiyyət daşıyır. Bu səfər qonağa işğaldan azad edilmiş ərazilərdə həyata keçirilən genişmiqyaslı bərpa və yenidənqurma işləri ilə yaxından tanış olmaq imkanı yaratdı. Eyni zamanda, bu, Azərbaycanın regionda həyata keçirdiyi inkişaf strategiyasına və sülh gündəliyinə beynəlxalq marağın artdığını nümayiş etdirdi. Prezident İlham Əliyevin vurğuladığı kimi, qarşılıqlı səfərlər siyasi münasibətlərin yüksək səviyyəsinin ən mühüm göstəricilərindən biridir. Belə təmaslar dövlətlər arasında etibarlı tərəfdaşlığı daha da möhkəmləndirir, yeni əməkdaşlıq istiqamətlərinin müəyyənləşdirilməsinə və ikitərəfli münasibətlərin bütün sahələr üzrə inkişafına xidmət edir. Bu gün Slovakiya–Azərbaycan münasibətləri uğurlu siyasi dialoq, qarşılıqlı etimad və ortaq maraqlara söykənən əməkdaşlıq modeli kimi inkişaf edir. İkitərəfli əlaqələrin dinamikası göstərir ki, gələcəkdə də siyasi münasibətlər daha da möhkəmlənəcək, qarşılıqlı səfərlər və yüksək səviyyəli təmaslar iki dost ölkə arasında əməkdaşlığın yeni nailiyyətlərlə zənginləşməsinə mühüm töhfə verəcəkdir.
Zahidə Sultanova
Saatlı Dövlət Rəsm Qalereyasının əməkdaşı
