Azərbaycan Prezidenti İlham Əliyevin “Avropa Siyasi Birliyi”nin gələcək Zirvə görüşləri ilə bağlı verdiyi açıqlama regionda diplomatik münasibətlərin yeni mərhələyə qədəm qoyduğunu göstərən mühüm siyasi mesaj kimi qiymətləndirilə bilər. Prezidentin çıxışında vurğulanan əsas məqam ondan ibarətdir ki, Azərbaycan regional sabitlik və qarşılıqlı əməkdaşlıq naminə balanslı yanaşmanı dəstəkləyərək 2026-cı ildə Zirvə görüşünün Ermənistanda keçirilməsi təşəbbüsünə müsbət münasibət bildirib. Bununla yanaşı, Azərbaycan tərəfi növbəti Zirvə görüşlərindən birinin ölkəmizdə təşkili təklifini irəli sürüb və bu təşəbbüs qəbul olunub. Nəticədə, 2028-ci ilin may ayında “Avropa Siyasi Birliyi”nin Zirvə görüşünün Azərbaycanda keçirilməsi qərara alınıb.
Bu prosesin diqqətçəkən tərəflərindən biri Ermənistanın Azərbaycanın namizədliyini dəstəkləməsidir. Uzun illər davam edən qarşıdurma və münaqişə fonunda belə bir dəstəyin nümayiş etdirilməsi iki ölkə arasında münasibətlərin normallaşması istiqamətində mühüm siyasi siqnal hesab olunur. Prezident İlham Əliyev bu məqamı xüsusi vurğulayaraq Azərbaycan və Ermənistan arasında sülhün real olduğunu qeyd edib. Onun sözlərinə görə, tərəflər artıq doqquz aydır sülh şəraitindədir və bu müddət ərzində sülh şəraitində yaşamağı öyrənirlər. Bu fikir regionda davamlı sabitliyin formalaşması baxımından xüsusi əhəmiyyət daşıyır.
Prezidentin çıxışında Avropa İttifaqı rəhbərliyi ilə aparılan dialoq da mühüm yer tutur. Avropa Şurasının Prezidenti Antonio Koşta və Avropa Komissiyasının Prezidenti Ursula fon der Lyayen ilə aparılan müzakirələr göstərir ki, Azərbaycan Avropa siyasi məkanında fəal iştirakçı kimi qəbul edilir və mühüm diplomatik tərəfdaş statusunu qoruyur. Azərbaycanın həm Ermənistanın təşəbbüsünü dəstəkləməsi, həm də öz növbəsində ölkəsinin gələcək Zirvə görüşünə ev sahibliyi etməsi regionda qarşılıqlı etimadın gücləndirilməsi üçün praktik addım kimi çıxış edir.
“Avropa Siyasi Birliyi” platforması Avropa qitəsində siyasi dialoq, təhlükəsizlik, iqtisadi əməkdaşlıq və regional sabitliyin gücləndirilməsi baxımından mühüm əhəmiyyət daşıyır. Azərbaycanın 2028-ci ildə bu mühüm tədbirə ev sahibliyi etməsi ölkənin beynəlxalq nüfuzunun artmasının, geosiyasi əhəmiyyətinin yüksəlməsinin və regional diplomatiyada artan rolunun göstəricisidir. Bu, həm də Azərbaycanın yalnız Cənubi Qafqazda deyil, daha geniş Avropa siyasi məkanında etibarlı tərəfdaş kimi mövqeyini möhkəmləndirir.
Nəticə etibarilə, Prezident İlham Əliyevin bu çıxışı Azərbaycan-Ermənistan münasibətlərində sülh perspektivinin gücləndiyini, Avropa siyasi institutları ilə əməkdaşlığın dərinləşdiyini və Azərbaycanın beynəlxalq diplomatik arenada rolunun daha da artdığını nümayiş etdirir. 2028-ci ildə Azərbaycanda keçiriləcək Zirvə görüşü yalnız siyasi tədbir deyil, həm də regionda yeni əməkdaşlıq və qarşılıqlı anlaşma mərhələsinin rəmzi kimi tarixə düşə bilər.
Rauf Salmanov
Saatlı rayon Heydər Əliyev Mərkəzinin əməkdaşı
