Azərbaycan ilə Slovakiya arasında münasibətlər qarşılıqlı hörmət, etimad və səmərəli əməkdaşlıq prinsiplərinə əsaslanır. Son illərdə iki ölkə arasında siyasi dialoq, iqtisadi-ticari əlaqələr, energetika, hərbi-texniki əməkdaşlıq və digər mühüm sahələr üzrə münasibətlər daha da inkişaf etmişdir. Yüksək səviyyəli qarşılıqlı səfərlər və aparılan müzakirələr tərəfdaşlığın möhkəmlənməsinə, yeni əməkdaşlıq istiqamətlərinin müəyyənləşdirilməsinə mühüm töhfə verir.
Slovakiyanın Azərbaycanın işğaldan azad edilmiş ərazilərində həyata keçirilən bərpa və yenidənqurma işlərinə verdiyi dəstək xüsusi əhəmiyyət daşıyır. Qarabağın yenidən qurulması prosesində beynəlxalq tərəfdaşların iştirakı bölgənin daha sürətli inkişafına və müasir yaşayış məntəqələrinin yaradılmasına xidmət edir. Bu baxımdan Slovakiya şirkətinin Ağdam rayonunun Baş Qərvənd kəndində həyata keçirdiyi “Ağıllı kənd” layihəsi diqqətəlayiq nümunələrdən biridir. Layihə müasir texnologiyaların tətbiqi, dayanıqlı infrastrukturun qurulması və sakinlər üçün yüksək həyat şəraitinin yaradılması baxımından mühüm əhəmiyyət kəsb edir.
Rəsmi görüşlər zamanı iki ölkə arasında əməkdaşlığın perspektivləri geniş şəkildə müzakirə olunmuşdur. Danışıqlarda iqtisadi və ticarət əlaqələrinin genişləndirilməsi, enerji sahəsində yeni imkanların araşdırılması, hərbi-texniki əməkdaşlığın inkişafı, investisiya layihələrinin həyata keçirilməsi, nəqliyyat, logistika, təhsil və digər istiqamətlər üzrə əməkdaşlığın dərinləşdirilməsi əsas prioritetlərdən olmuşdur. Görüşlərin səmimi və açıq şəraitdə keçirilməsi tərəflər arasında qarşılıqlı etimadın yüksək səviyyədə olduğunu bir daha nümayiş etdirmişdir.
Səfər çərçivəsində nümayəndə heyətlərinin üzvləri arasında da intensiv görüşlər keçirilmiş, müxtəlif sahələr üzrə əməkdaşlıq imkanları ətrafında fikir mübadiləsi aparılmışdır. Bu cür təmaslar iki ölkənin aidiyyəti qurumları arasında əlaqələrin genişlənməsinə, yeni layihələrin hazırlanmasına və mövcud əməkdaşlığın daha da möhkəmləndirilməsinə şərait yaradır.
Prezidentin Azərbaycana rəsmi səfərinin proqramına Qarabağa səfərin də daxil edilməsi xüsusi əhəmiyyət daşıyır. Bu, işğaldan azad edilmiş ərazilərdə aparılan genişmiqyaslı quruculuq işlərinin beynəlxalq tərəfdaşlara nümayiş etdirilməsi, həyata keçirilən layihələrin yerində təqdim olunması və gələcək əməkdaşlıq imkanlarının qiymətləndirilməsi baxımından mühüm addımdır. Qarabağda həyata keçirilən bərpa layihələrinin beynəlxalq tərəfdaşlar tərəfindən dəstəklənməsi bölgənin sürətli inkişafına mühüm töhfə verir.
Ümumilikdə, Slovakiya Prezidentinin Azərbaycana və Qarabağa səfəri iki ölkə arasında dostluq münasibətlərinin, qarşılıqlı etimadın və strateji əməkdaşlığın yüksək səviyyədə olduğunu göstərir. Bu səfər siyasi dialoqun daha da güclənməsinə, iqtisadi və humanitar əlaqələrin genişlənməsinə, eləcə də Qarabağın bərpası istiqamətində beynəlxalq əməkdaşlığın inkişafına mühüm töhfə verən əlamətdar hadisə kimi qiymətləndirilir.
Telman Ağayev
Saatlı rayon Heydər Əliyev Mərkəzinin direktoru
