Şuşa Qlobal Media Forumu artıq beynəlxalq media nümayəndələrinin, ekspertlərin və fikir liderlərinin bir araya gəldiyi nüfuzlu platformalardan birinə çevrilmişdir. Forumun əsas məqsədi dünyanın müxtəlif ölkələrindən gələn media təmsilçiləri üçün aktual beynəlxalq məsələlərin, qarşılıqlı maraq və narahatlıq doğuran mövzuların müzakirəsi üçün açıq dialoq mühiti yaratmaq, eyni zamanda onları Qarabağ və Şuşada həyata keçirilən genişmiqyaslı bərpa və yenidənqurma işləri ilə yaxından tanış etməkdir.
Forum iştirakçıları yalnız müzakirələrdə iştirak etməklə kifayətlənmirlər, həm də Qarabağda baş verən dəyişiklikləri öz gözləri ilə görmək imkanı əldə edirlər. İlk dəfə bu bölgəyə gələn qonaqlar işğalın ağır nəticələrini, dağıdılmış şəhər və kəndləri müşahidə etmişdilər. Lakin sonrakı səfərlərində onlar tamamilə fərqli mənzərə ilə qarşılaşırlar. Müasir yaşayış məhəllələri, yeni inşa olunmuş evlər, məktəblər, xəstəxanalar, yollar, sosial və mədəni obyektlər, abadlaşdırılmış küçələr və öz doğma torpaqlarına qayıdan insanların gündəlik həyatı Qarabağın sürətli inkişafının real göstəriciləridir. Bu dəyişikliklər Azərbaycanın azad edilmiş ərazilərdə həyata keçirdiyi genişmiqyaslı quruculuq siyasətinin nəticəsini əyani şəkildə nümayiş etdirir.
Forumun hər il fərqli mövzu ətrafında keçirilməsi onun aktuallığını və əhəmiyyətini daha da artırır. Müzakirə olunan məsələlər müasir dövrdə dünyanı narahat edən geosiyasi prosesləri, informasiya təhlükəsizliyini, rəqəmsal medianın inkişafını, dezinformasiyaya qarşı mübarizəni və beynəlxalq əməkdaşlığın gücləndirilməsi yollarını əhatə edir. Bu da Forumu təkcə regional deyil, həm də qlobal əhəmiyyətə malik tədbirə çevirir. Müxtəlif ölkələri təmsil edən jurnalistlər, media rəhbərləri, analitiklər və ekspertlər burada fikir mübadiləsi aparır, yeni əməkdaşlıq əlaqələri qurur və peşəkar təcrübələrini paylaşırlar.
Şuşa şəhərinin belə mötəbər tədbirə ev sahibliyi etməsi xüsusi rəmzi məna daşıyır. Azərbaycanın mədəniyyət paytaxtı olan Şuşa bu gün yalnız tarixi və mədəni irsi ilə deyil, həm də beynəlxalq dialoq və əməkdaşlıq məkanı kimi tanınır. Forum çərçivəsində yaranan səmimi və mehriban atmosfer müxtəlif ölkələrdən gəlmiş iştirakçılar arasında dostluq münasibətlərinin formalaşmasına, xalqlar arasında qarşılıqlı etimadın və anlaşmanın möhkəmlənməsinə xidmət edir.
Forumun ən mühüm cəhətlərindən biri də ictimai rəyin formalaşmasına təsir göstərən nüfuzlu media nümayəndələrinin Qarabağ həqiqətlərini yerində görmələridir. Onlar azad edilmiş ərazilərdə həyata keçirilən bərpa və yenidənqurma işlərini, keçmiş məcburi köçkünlərin öz doğma yurdlarına qayıdışını, yeni yaşayış məntəqələrinin salınmasını və bölgədə yaradılan müasir infrastruktur layihələrini yaxından müşahidə edirlər. Bu isə dünya ictimaiyyətinə obyektiv və faktlara əsaslanan məlumatların çatdırılmasına mühüm töhfə verir.
Beləliklə, Şuşa Qlobal Media Forumu yalnız media sahəsində fikir mübadiləsi aparılan beynəlxalq platforma deyil, həm də Qarabağın dirçəlişini, bölgədə aparılan quruculuq işlərini və Azərbaycanın sülh, inkişaf və əməkdaşlıq siyasətini dünyaya nümayiş etdirən mühüm tədbirdir. Forum hər il artan beynəlxalq maraq fonunda öz əhəmiyyətini daha da gücləndirərək, Şuşanı qlobal media dialoqunun əsas mərkəzlərindən birinə çevirməkdə davam edir.
Rauf Salmanov
Saatlı rayon Heydər Əliyev Mərkəzinin əməkdaşı
