Milli Məclisin sədri Sahibə Qafarova parlamentin bu gün, 27 aprel tarixli iclasının yekununda Prezident İlham Əliyevin “Sülh və Barışıq üçün Gernika mükafatına” layiq görülməsi barədə çıxış edib.
xeberde.az-ın məlumatına görə, spiker bildirib ki, Prezident İlham Əliyev Azərbaycan ilə Ermənistan arasında sülhün əldə olunması və dialoqun təşviqi istiqamətində göstərdiyi səylərə görə “Sülh və Barışıq üçün Gernika mükafatına” layiq görülüb:
“Cənab Prezident aprelin 26-da mükafatın təqdimolunma mərasiminin iştirakçılarına müraciət ünvanlayıb və bu, mötəbər mükafata layiq görülməyinə görə öz minnətdarlığını bildirib. Bu mükafat bütün çətinliklərə baxmayaraq, regionumuzda sülhün, sabitliyin və əməkdaşlığın bərqərar olunması naminə möhtərəm cənab Prezidentin göstərdiyi böyük səylərin beynəlxalq ictimaiyyət tərəfindən də qəbul edilməsi və yüksək qiymətləndirilməsi deməkdir. 30 il ərzində torpaqlarının işğalı ilə üzləşmiş və münaqişə şəraitində yaşamış xalqın nümayəndələri olaraq biz möhtərəm cənab Prezidenti bu mötəbər mükafata layiq görülməsi münasibətilə ürəkdən təbrik edir, cənab Prezidentə sülh və qarşılıqlı anlaşma naminə yorulmaz fəaliyyətində davamlı uğurlar arzulayırıq”.
Deputatlar sədrin çıxışına alqışlarla reaksiya verərək təbriklərə qoşulublar.
