Prezident İlham Əliyevin IV Şuşa Qlobal Media Forumunda çıxışı Azərbaycanın beynəlxalq informasiya məkanında artan rolunu və Şuşanın qlobal dialoq platforması kimi möhkəmlənən mövqeyini bir daha nümayiş etdirdi. Dövlət başçısı vurğuladı ki, artıq ənənə halını alan Şuşa Qlobal Media Forumu hər il daha geniş coğrafiyanı əhatə edir və dünyanın müxtəlif ölkələrindən media nümayəndələrini, ekspertləri və beynəlxalq təşkilatların təmsilçilərini bir araya gətirir. Forumun iştirakçı sayının ildən-ilə artması onun beynəlxalq nüfuzunun yüksəldiyini göstərən əsas göstəricilərdən biridir. Dünyanın müxtəlif qitələrindən jurnalistlərin, media rəhbərlərinin və analitiklərin tədbirə maraq göstərməsi Şuşa Forumunun artıq regional deyil, qlobal əhəmiyyət daşıyan platformaya çevrildiyini təsdiqləyir. Burada media sahəsində aktual məsələlər, informasiya təhlükəsizliyi, süni intellektin media sektoruna təsiri, dezinformasiyaya qarşı mübarizə və beynəlxalq əməkdaşlıq kimi mühüm mövzular geniş müzakirə olunur. Prezident İlham Əliyev çıxışında qeyd edib ki, forum açıq dialoq mühiti yaradır və iştirakçılar Azərbaycan haqqında məlumatları birbaşa mənbədən əldə etmək imkanı qazanırlar. Bu isə ölkəmizin beynəlxalq aləmdə obyektiv təqdim olunmasına, həqiqətlərin dünya ictimaiyyətinə çatdırılmasına və media nümayəndələri arasında peşəkar əməkdaşlığın genişlənməsinə mühüm töhfə verir. Şuşada belə mötəbər beynəlxalq tədbirin keçirilməsi xüsusi rəmzi məna daşıyır. Azərbaycan xalqının mədəniyyət paytaxtı olan Şuşa artıq yalnız tarixi və mədəni irsi ilə deyil, həm də beynəlxalq konfransların, forumların və qlobal müzakirələrin keçirildiyi nüfuzlu məkan kimi tanınır. Bu, işğaldan azad edilmiş ərazilərdə həyata keçirilən genişmiqyaslı bərpa və quruculuq işlərinin, eləcə də ölkəmizin beynəlxalq əməkdaşlığa verdiyi önəmin bariz ifadəsidir. IV Şuşa Qlobal Media Forumu bir daha göstərdi ki, Azərbaycan qlobal informasiya məkanında etibarlı tərəfdaş kimi çıxış edir. Forumun hər il daha çox iştirakçını cəlb etməsi onun gələcəkdə də beynəlxalq media ictimaiyyətinin diqqət mərkəzində qalacağını və müxtəlif ölkələr arasında dialoq, qarşılıqlı anlaşma və əməkdaşlığın inkişafına mühüm töhfə verməyə davam edəcəyini göstərir.
Ələddin Zeynalov
Saatlı Tarix-Diyarşünaslıq Muzeyinin əməkdaşı
