Azərbaycanın müasir tarixində sülh və suverenliyin bərpası prioritet məsələ olmuşdur. İşğal dövründə ölkə üçün əsas hədəf ərazi bütövlüyünün təmin olunması və xalqın təhlükəsizliyinin qorunması idi. Dövlət rəhbərliyi bir çox forum və beynəlxalq tədbirlərdə dəfələrlə qeyd etmişdir ki, bu proses Azərbaycanın gündəliyində ən vacib məsələ olub və hər zaman siyasi iradə, cəsarət və sadiqlik tələb edib.
Xoşbəxtlikdən, bu gün Azərbaycan artıq sülh şəraitində yaşayır. Hələlik cəmi yeddi aydır ki, ölkədə davamlı sülh bərqərar olmuşdur. Bu, göstərir ki, məqsədlərə çatmaq üçün güclü siyasi iradə və prinsipial mövqe kifayətdir. Sülh və ədalət uğrunda göstərilən səylər nəticəsində uzun illər davam edən münaqişələr həll olunmuşdur.
Suverenliyin və ərazi bütövlüyünün bərpası təxminən 30 il davam edən proses nəticəsində reallaşmışdır. Bu müddət ərzində Azərbaycan BMT Nizamnaməsinin 51-ci maddəsində nəzərdə tutulmuş özünü müdafiə hüququ çərçivəsində hərəkət etmişdir. Bu yanaşma beynəlxalq hüquqa əsaslanaraq ölkənin ərazi bütövlüyünü bərpa etməyə və xalqın təhlükəsizliyini təmin etməyə imkan vermişdir.
Nəticədə, Azərbaycan təcrübəsi göstərir ki, uzunmüddətli sülh və ərazi bütövlüyünün təmin olunması yalnız güclü siyasi iradə, strateji qərarlar və beynəlxalq hüquqa hörmət əsasında mümkündür. Bu həm dövlət üçün daxili stabilliyi təmin edir, həm də regionda sülh və əməkdaşlıq üçün nümunə yaradır.
Rauf Salmanov
Saatlı rayon Heydər Əliyev Mərkəzinin əməkdaşı
