Azərbaycan tarixində Qarabağ münaqişəsi xalqımız üçün həm böyük faciələr, həm də möhtəşəm qələbələrlə yadda qalmışdır. Birinci Qarabağ müharibəsi ölkəmizin ən ağır dövrlərindən biri olmuş, yüz minlərlə soydaşımız öz yurd-yuvasından didərgin düşmüşdür. Ermənistanın həyata keçirdiyi etnik təmizləmə siyasəti nəticəsində on minlərlə insan ağır məhrumiyyətlərə məruz qalmış, yüzlərlə şəhər və kənd yerlə-yeksan edilmişdir. Xüsusilə Xocalı soyqırımı Azərbaycan xalqının yaddaşına silinməz bir iz salmış, uşaqlar, qadınlar və qocalar amansızcasına qətlə yetirilmişdir. Bu gün də 3000-dən çox vətəndaşımızın taleyi məlum deyil və onların aqibəti xalqımız üçün dərin bir yara olaraq qalır.
2020-ci ildə baş vermiş Vətən müharibəsi isə Azərbaycan dövlətinin gücünü, Ordumuzun qüdrətini və xalqımızın sarsılmaz iradəsini bütün dünyaya göstərdi. Ali Baş Komandanın rəhbərliyi ilə 44 gün davam edən döyüşlər Azərbaycanın tarixi Qələbəsi ilə nəticələndi. İllərlə həsrətində olduğumuz torpaqlar işğaldan azad edildi, tarixi ədalət bərpa olundu. Lakin qələbədən sonra belə cəmiyyətdə intiqam çağırışları eşidilirdi. Prezident İlham Əliyev xalqa müraciətində vurğulamışdır ki, biz intiqamı döyüş meydanında aldıq. Azərbaycan düşmənə bənzəməyəcək, çünki Ermənistanın törətdiyi cinayətləri biz təkrar etməyəcəyik.
Bu gün regionda tamamilə yeni bir siyasi və hərbi reallıq formalaşıb. Güc balansı hərtərəfli şəkildə Azərbaycanın xeyrinədir. Vaşinqtonda imzalanmış sənədin əhəmiyyəti də məhz buradan qaynaqlanır. Əgər Ermənistanın gələcək hökuməti həmin sənədin müddəalarını şübhə altına alarsa, bu, onların özləri üçün ağır nəticələr doğuracaq. Azərbaycan artıq regionda sülhün və sabitliyin təminatçısına çevrilib və öz ərazi bütövlüyünü qorumaqda qətiyyətlidir.
Beləliklə, Qarabağ müharibələrinin tarixi yalnız keçmişin faciələrini deyil, həm də xalqımızın gücünü, milli birliyini və yenilməz iradəsini nümayiş etdirir. Azərbaycan qalib dövlət kimi regionda yeni reallıqlar yaradır və bu reallıq hər kəs tərəfindən qəbul edilməlidir.
Eynullayev Hüseyn
Saatlı rayon Heydər Əliyev Mərkəzinin əməkdaşı
