Tarixdə qadın hüquqlarının inkişafı cəmiyyətin demokratikləşməsinin mühüm göstəricilərindən biri hesab olunur. Bu baxımdan Azərbaycan xüsusi yer tutur. Belə ki, Şərqdə qadınlara seçmək və seçilmək hüququ ilk dəfə məhz Azərbaycan Xalq Cümhuriyyəti dövründə verilmişdir. 1918-ci il mayın 28-də müstəqilliyini elan edən Azərbaycan Xalq Cümhuriyyəti qısa müddət ərzində demokratik dövlət quruculuğu istiqamətində mühüm addımlar atmışdır. Bu dövlətin qəbul etdiyi qanunlar və həyata keçirdiyi islahatlar həmin dövr üçün çox qabaqcıl hesab olunurdu. Cümhuriyyətin ən mühüm nailiyyətlərindən biri qadınlara seçki hüququnun verilməsi idi. Bu qərar qadınların ölkənin siyasi həyatında iştirakını təmin etdi və onların hüquqi statusunun yüksəlməsinə böyük töhfə verdi. Bu addım yalnız Şərq ölkələri üçün deyil, bir çox Avropa dövlətləri üçün də nümunəvi idi. Çünki həmin dövrdə bəzi Avropa ölkələrində qadınlara seçki hüququ hələ verilməmişdi. Azərbaycan Xalq Cümhuriyyətinin bu qərarı qadın və kişi bərabərliyi prinsipinin dövlət siyasətində mühüm yer tutduğunu göstərirdi. Qadınlara seçki hüququnun verilməsi Azərbaycan cəmiyyətində demokratik dəyərlərin formalaşmasına və inkişafına böyük təsir göstərdi. Bu hüquq sayəsində qadınlar dövlət idarəçiliyində, ictimai və siyasi proseslərdə daha fəal iştirak etməyə başladılar. Nəticə etibarilə, Şərqdə qadınlara ilk dəfə seçib-seçilmək hüququnun Azərbaycanda verilməsi ölkənin demokratik və qabaqcıl dövlətçilik ənənələrinin mühüm göstəricilərindən biridir. Bu tarixi addım Azərbaycan qadınlarının cəmiyyətdəki mövqeyinin möhkəmlənməsinə və onların hüquqlarının tanınmasına böyük töhfə vermişdir.
Əsmər Əliyeva
Saatlı Tarix-Diyarşünaslıq Muzeyinin əməkdaşı
