Şəhid analarının göz yaşına şərik olub, onların qürur dolu təbəssümünü Televiziya ekranından izləyicilərə çatdıran xanım jurnalist Nuranə Gülər Azərbaycan mediasında həssas mövzulara xüsusi yanaşması ilə seçilir. O, reportajlarında təkcə faktları deyil, anaların ürək ağrısını, şəhid adının ucalığını və Vətən sevgisinin böyüklüyünü də qələmə alır.
Nuranə Gülər üçün şəhid ailələri ilə görüş sadəcə peşə borcu deyil, mənəvi məsuliyyətdir. O, hər müsahibəsində ana fəryadının arxasında duran qüruru göstərməyə çalışır. Çünki şəhid anaları həm ağlayan, həm də Vətən üçün oğul böyütməyin qürurunu yaşayan qəhrəman qadınlardır.
Onun hazırladığı verilişlər insanları hadisənin içinə aparır, səmimiyyəti ilə inam yaradır. Şəhid ailələrinin evində içilən bir stəkan çayın, divardan asılan əsgər şəklinin, qorunan xatirələrin dili ilə danışır. Bu yanaşma jurnalistikanın ən ali missiyasını – insan taleyini duyaraq çatdırmağı – özündə birləşdirir.
müsahibə zamanı yalnız sual verən tərəf olmur, eyni zamanda dinləməyi bacaran bir insan kimi çıxış edir. Bəzən kameralar söndükdən sonra da söhbət davam edir, çünki əsas məqsəd sensasiya deyil, insan dərdinə şərik olmaqdır. Onun hər verilişində şəhid analarının səsi daha gur, daha təsirli eşidilir.
Nuranə Gülər reportajlarında detalçılığa xüsusi önəm verir. Bir evin sakitliyində divardan asılan hərbi forma, səliqə ilə qatlanmış məktublar, şəhid oğulun uşaqlıq şəkilləri – bütün bunlar onun yazılarında canlı tabloya çevrilir. Oxucu həmin evə qonaq olur, ananın titrəyən səsini eşidir, həm kədəri, həm də qüruru birlikdə yaşayır. Bu, sadəcə informasiya ötürmək deyil, yaddaş yaratmaqdır.
Onun qələmində şəhid anlayışı pafosdan uzaq, səmimi və insani çalarlarla təqdim olunur. O, qəhrəmanlığı şüarlarla deyil, həyat hekayələri ilə göstərir. Hər veriliş cəmiyyətə bir mesajdır: şəhid ailələri unudulmamalıdır, onların dərdi də, qüruru da paylaşılmalıdır.
Belə jurnalistlər media məkanında xüsusi yer tutur. Çünki onlar xəbəri ötürməklə kifayətlənmir, ictimai vicdanın formalaşmasına xidmət edirlər. Nuranə Gülər də məhz bu missiyanı daşıyan qələm sahiblərindəndir. Onun fəaliyyəti sübut edir ki, həqiqi jurnalistika yalnız peşəkarlıq deyil, həm də ürək işidir. Şəhid anaları ilə ağlayıb, onlarla gülə bilmək isə hər jurnalistə nəsib olan xüsusiyyət deyil.
Hazırladı: Mirismayıl Xələfli
Xeberde.az
